(( كلمات بيتوتية ))

من طرف **م./ محمد عبده** السبت 25 سبتمبر 2010, 8:31 pm

النهاردة جبتلكم شوية جمل بتتقال فى كل بيت

أشهر جمل بيقولها الأب و الأم في مصر

وعندها ستبتسمون كثيرا

* امشى جاتك مشش فى ركبك .

* جتها نيلة الى عايزة خلف تيجى تتفرج .

*ذاكر ياموكوس مش فالح غير فى الهيافه والكلام الفاضى.

* ربنا يرزقك بعيل يوريك اللي ورتهوني.

* هات كيس عيش وانت راجع.

* هو ده اللي انت فالح فيه طول اليل والنهار قاعد علي الزفت

الكمبيوتر بتاعك لحد مهيجلك تخلف عقلي منه .

* كل يوم هات هات لمة ربيتلى الهتهات يا ولية

* هتذااااااااكر هتاخد عنية مش هتذااااااااااكر هتاخد بالجزمة

*أوعى حد يضحك عليك ويقولك جرب السيجارة دي.

*ابقى ورينى مين حينفعك فى الاخر من شوية

الصيع الى انت مشيلى وراهم .

* آهى دقنى أههه لو فلحت

* قوم اقرا لك كلمتين ينفعوك .

* وطي المدعوق ده شويه .

* انت فاكرنا نايمين على ودانا ؟

*لما ما ترضاش تاكل في البيت:

طبعا مانت اتعودت علي اكل بره .

*ياريتك تحفظ دروسك زى مانت حافظ الاغانى.

* عيـــب ... لازم تحترم اللي أكبر منك .

* لو شفت خناقه ما لكش دعوة بيها .

* الواد سيد ده عيل بايظ وماتمشيش معاه تاني .

* مين منى دي انتى كل يوم تصاحبي واحدة جديدة ؟.

* انت مبتاكلش جزر ليه .. اجيبلك برتقانه. طب كل سلطه .

* يابني بأسلوبك ده مش هتعيش معاك واحده .

* قومي ساعدي امك ده اللي هيتجوزك أمه داعية عليه.

* اوعى حد غريب يديلك حاجه تاكليها ولآ تشرببها و تاخديها منه .

* يا ابني حرام عليك الى بتعمله فينا ده.

* انا سايبالكوا البيت وماشية ومش حتشوفوا وشي تاني .

* لمى هدومك انتى مش عايشة فى زريبة بكرة اشوف بيتك هيبقى

ازاى خرابة طبعا.

* وانت فاكر احنا مستنيين منك حاجه .

* المسلسل مش هينفعك ...قوم .

*ماتقعد يابنى تكمل أكلك , انت كلت حاجة!!!

(طيب ماهو انا لو جعان أو الأكل عاجبنى إيه اللى هيخلينى أقوم يعنى

, هو انا غاوى جوع مثلا ).

* كفايه رغي في التليفونات .

* كل على مهلك .. وامضغ كويس ... وما تكلش وانت واقف .. وكل

من قدامك ما تحفش .

* اطفي التلفزيون وقوم ذاكر ولا و خش اوضتك .

* بلاش تمشى حافى البس شبشب وانته داخل الحمام .

* ما فيش مذاكرة على المزيكا .. وازاى بتذاكر و البتاع ده شغال جنبك .

* افردى ظهرك يا بت.

* لمى شراباتك .

* ماتكليش فى ضوفرك.

* كنت فين لحد دلوقتى يا صايع.

* ماتتأخرش علشان عندك كلية بكرة بدرى.

* انا مش عارفه انت طالع لمين.

* انا : ياماما بقه ايه ده ؟؟؟

ماما: مووو لمـا يــــــخدك .

* ادلعى ياهبة فى ايامك المهببة .

* ده منظر اوضة بني آدمين ، انت عايش فيها ازاي؟.

* الى يطلع من الاوضه يطفى النور وراه .

*أبوك عندك أهو اتصرف معاه .

* اللي بيشيل قربه مخرومة بتخر عليه لوحده ..

* لو مش فاهم حاجه ارفع ايدك و قول للأستاذ مش فاهم .. متتكسفش .

* البس فنله قطن تحت ودفي سدرك ودخل التيشرت في بنطلون

البيجامه وانت نايم .

* يابنى المذاكره مابتخلص .... نفسى اشوفك مره ماسك كتاب.

* اعمل حسابك مش حندخلك جامعه خاصه.

* قالب ليلك نهارك طول الليل صاحى وطول النهار نايم

طبعاً ما حضرتش ولا محاضرة ولا سكشن ,

وطول اليوم صايع بره البيت .

* مالكش دعوة بالسياسة .. وماتمشيش في مظاهرات .

و امشي جوا الحيط .

* احمد ربنا الاكل الى مش عجبك ده فى ناس مش لقينه .

* التهديدات المخيفه والمرعبه :

مثل: هأقطم رقبتك أو هأقطع ايدك أو هأقطع لك لسانك

أو هأدبحك دبح .

* قومي سخني الأكل لأخوكي.

* وغطى اكتافك دى قدام أخوكى.

* ياماما الدنيا حر.

* موو لم ياخدك أمشى يا بت واسمعى الكلام.

* إيه الذل ده كمان ف البيت هانمشى متكتفين.

* ومن اشهر الجمل الى بتتقال كل يوم بعد الاكل :

انا مش الخدامه اللي اشترهالكوا ابوكوا اللي ياكل

في طبق او يشرب في كباية يغسلها ما يركنهاش في الحوض.

* و أخيرا ::

ضرب امثلة تشجع على الكفاح و أشهرها

أحد الأقارب اللي كان بيذاكر على لمبة

جاز أو على عامود النور الي في الشارع

و نجح وخد الدكتوراه وسافر أمريكا

(قال يعنى كان بيعرف يركز والناس ماشيه حواليه فى الشارع )

(( كلمات بيتوتية )) 7

مع خالص تحياتى للجمييع

(( كلمات بيتوتية )) 7

إن ترحلى لن تهدم الدنيا

ولن تغلق أبواب السماء...

فأنا في أمور الحب ما عدت

التفت إلى الوراء ...

ففي كل عام تسقط اوراق الخريف

وحب الصيف يمحوه الشتاء...

فالحب لا يأتي بتاتا بالتوسل

ولن ينفع يا امرأة فيه الرجاء...

والغرور عندك لم يعد يجدى بشىء

بل زاد عندى كل ذرة كبرياء....

((فالحب شيء يا امرأة

و كرامتي اشياء .... ))

من طرف **القلب الكبير** السبت 25 سبتمبر 2010, 8:40 pm

ههههههههههههههههههههههههههههههه

الله عليك

والله عندك حق ده واقع وواقع مضحك

تسلم اخى الغالى

من طرف **شهرزاد** السبت 25 سبتمبر 2010, 8:59 pm

ههههههههههههههههه

انت جمعتهم ازاى كل دول هههههههههههههه

طب والله كلهم بيتقالو عندنا كمان بس بلهجة اخرى تموت من الضحك

مشكور اخى على موضوعك المميز واللى بجد ضحكنا من قلوبنا

من طرف **م./ محمد عبده** السبت 25 سبتمبر 2010, 10:26 pm

أخى الفاضل

القلب الكبير

أختى الفاضلة

شهر زاد

أنا بصراحة ضحكت كتير عليهم وانا باكتبهم

فكرونى بأيام زمان الحلوة

شكرا لمروركما

(( كلمات بيتوتية )) 7

مع خالص تحياتى للجمييع

(( كلمات بيتوتية )) 7

إن ترحلى لن تهدم الدنيا

ولن تغلق أبواب السماء...

فأنا في أمور الحب ما عدت

التفت إلى الوراء ...

ففي كل عام تسقط اوراق الخريف

وحب الصيف يمحوه الشتاء...

فالحب لا يأتي بتاتا بالتوسل

ولن ينفع يا امرأة فيه الرجاء...

والغرور عندك لم يعد يجدى بشىء

بل زاد عندى كل ذرة كبرياء....

((فالحب شيء يا امرأة

و كرامتي اشياء .... ))

(( كلمات بيتوتية ))

(( كلمات بيتوتية ))

رد: (( كلمات بيتوتية ))

رد: (( كلمات بيتوتية ))

رد: (( كلمات بيتوتية ))